चितवन : भरतपुर महानगरपालिकामा दोस्रो कार्यकालका लागि मेयरमा पाँच दलीय गठबन्धनबाट नेकपा माओवादी केन्द्रकी रेणु दाहाल भारी मतका साथ विजयी हुनुभएको छ। उहाँले निकटतम प्रतिस्पर्धी नेकपा (एमाले)का विजय सुवेदीलाई १२ हजार ४ सय ४९ मतान्तरका साथ पराजित गर्नुभएको हो।

दाहालले ५२ हजार ३० मत प्राप्त गर्दा सुवेदीले ३९ हजार ५ सय ८१ मत प्राप्त गर्नुभएको छ । यस्तै स्वतन्त्र उमेदवार जगन्नाथ पौडेलले १४ हजार ७ सय २८ मत प्राप्त गर्नुभएको छ।

यस्तै उपमेयरमा पनि गठबन्धनका तर्फबाट नेपाली कांग्रेसका चित्रसेन अधिकारी भारी मतान्तरका साथ विजयी हुनुभएको छ । उहाँले राप्रपाका हिमला गुरूङलाई २२ हजार १ सय ९१ मतान्तरले पराजित गर्नुभएको हो । अधिकारीले ५२ हजार ८ सय ३ मत प्राप्त गर्दा गुरूङले ३० हजार ६ सय १२ मत प्राप्त गर्नुभएको छ ।

महानगरमा १ लाख २७ हजार ८ सय ३९ मत खसेको थियो । जसमा नेपाली कांग्रेसले अधिकांश वडामा जित हासिल गरेको छ । भरतपुर महानगरमा नेपाली कांग्रेसले वडा नं १ ,२ ४, ५, ६, ८, १०, १४, १५, १६, १७, २०, २१, २३, २७ र २९ गरी १६ वटा वडा जितेको छ ।

यस्तै नेकपा एमालेले ३, ११, १२, १८, १९ र २८ गरेर ६ वटा वडा जितेको छ भने नेकपा (एकीकृत समाजवादी) ले ७, ९, २२ गरेर ३ वटा वडा जितेको छ । नेकपा माओवादी केन्द्रले पनि वडा नं १३, २४, २६ मा जित्न सफल भएको छ । यस्तै वडा नं २५ मा स्वतन्त्र उमेदवार विजयी हुनुभएको छ ।