काठमाडौं : स्थानीय निर्वाचन सुरु भएसँगै देशका विभिन्न स्थानबाट शीर्ष नेताहरुले मतदान गर्नु भएका छन् ।
प्रधानमन्त्री शेरबहादुर देउवाले गृहजिल्ला डडेल्धुराको गन्यापधुरा गाउँपालिका पुगेर मतदान गर्नुभएको छ । गन्यापधुरा गाउँपालिका–१ मा स्थित असिग्राम मावि मतदान केन्द्रबाट देउवाले मतदान गर्नुभएको हो । आफूले कक्षा ३ सम्मको अध्ययन गरेको विद्यालय केन्द्रबाट प्रधानमन्त्री देउवाले मतदान गर्नुभएको हो ।
बिहीबार साँझ धनगढीमा बास बस्नु भएका देउवा शुक्रबार बिहान हेलिकप्टरबाट डडेल्धुरा पुग्नु भएको थियो । गत मंगलबारदेखि डडेल्धुरा र धनगढीमा बसिरहनु भएका देउवा शुक्रबार काठमाडौं फर्कने कार्यक्रम रहेको छ ।
नेकपा एमालेका अध्यक्ष केपी शर्मा ओलीले भक्तपुरको सूर्यविनायक नगरपालिकाको बालकोटस्थित ‘क’ मतदान केन्द्रबाट मतदान गर्नुभएको छ ।
यस्तै, नेकपा माओवादी केन्द्रका अध्यक्ष पुष्पकमल दाहालले चितवनको भरतपुर महानगरपालिका–१४ स्थित शान्तिपुरको पुलिस मा.वि.बाट मतदान गर्नुभएको छ ।
यस्तै, नेकपा समाजवादीका नेता एवं पूर्व प्रधानमन्त्री झलनाथ खनालले ईलामको सूर्योदय नगरपालिका–९ रम्फोकस्थित राष्ट्रिय आधारभुत विद्यालय मतदान केन्द्रबाट मतदान गर्नुभएको छ ।
यसैगरी पूर्व राष्ट्रपति डा. रामबरण यादवले धनुषाको लक्ष्मनीया गाउँपालिकाको सपही मतदान केन्द्रबाट मत हाल्नु भएको छ ।
नेपाली कांग्रेसका वरिष्ठ नेता रामचन्द्र पौडेलले व्यास नगरपालिका–२ सत्यवती माध्यामिक विद्यालयको मतदान केन्द्र (ख) मतदान गर्नुभएको छ ।
जनता समाजवादीका नेता एवं पूर्व प्रधानमन्त्री डा बाबुराम भट्टराइले गोर्खाको पालुङटार नगरपालिकाको अन्नपूर्ण मा.वि. मतदान केन्द्रबाट मतदान गर्नुभएको छ ।
यसैगरी, राप्रपा अध्यक्ष राजेन्द्र लिङ्देनले झापाको हल्दीबारी गाउँपालिका–१ बाट मतदान गर्नुभएको छ ।
राष्ट्रिय प्रजातन्त्र पार्टी नेपालका अध्यक्ष कमल थापाले हेटौंडा–६ स्थित वंशगोपाल उच्च माविको मतदान केन्द्रबाट मतदान गर्नुभएको छ ।
नेकपा एकीकृत समाजवादीका अध्यक्ष तथा पूर्वप्रधानमन्त्री माधवकुमार नेपालले रौतहटको गौर नगरपालिका–१ स्थित कन्या प्राथमिक विद्यालयमा मतदान गर्नु भएको छ ।
