मकवानपुर : मकवानपुरको मनहरिमा बिहान भएको बस दुर्घटनामा दुई जनाको मृत्यु भएको छ ।पूर्व-पश्चिम महेन्द्र राजमार्गअन्तर्गत मकवानपुरको मनहरी गाउँपालिका-६ मा भएको दुर्घटनामा मृत्यु भएका दुई जनाको सनाखत गरिएको  छ।

मृत्यु हुनेहरूमा बसका सहचालक नुवाकोटको तारकेश्वर गाउँपालिका-४ निवासी २२ वर्षीय सुवास श्रेष्ठ र उक्त बसमा सवार सोही ठाउँका २९ वर्षीय शम्भु दराई मगर रहेको जिल्ला प्रहरी कार्यलयका प्रवक्ता प्रहरी नायब उपरीक्षक जयश्वर रिमालले जानकारी दिए।

प्रहरीका अनुसार हेटौँडाबाट चितवनतर्फ आइरहेको ना ४ ख ४४५४ नम्बरको बस आज बिहान ८:३० बजे मनहरी ६ को कुलचोकमा दुर्घटना भएको हो। दुर्घटनामा दुई जनाको घटनास्थलमै मृत्यु भएको मनहरीस्थित इलाका प्रहरी कार्यालयका प्रहरी निरीक्षक प्रकाश थापाले जानकारी दिए।

बसमा कति यात्रु सवार थिए भन्ने यकिन विवरण नआइसकेको र दुर्घटनाको कारण पनि खुल्न नसकेको उनको भनाइ थियो। घाइते भएकाहरूलाई चितवनको अस्पताल  ल्याइएको र मृतकको शव परीक्षणका लागि हेटौँडा अस्पताल पठाइएको छ।