नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले प्रतिगमनको बाटो हिँड्ने प्रधानमन्त्री केपी शर्मा ओली र अरु नेता उस्तै नभएको बताएका छन् ।
बुधबार विपक्षी गठबन्धमा रहेका पाँच दलनिकट विद्यार्थी संगठनले बुझाएको ज्ञापनपत्र बुझ्दै उनले सम्पूर्णरुपमा आत्मसमर्पण गर्ने ओली र उनका विरुद्धमा उभिएका अरु नेता उस्तै हुन नसक्ने बताएका हुन् । विगतदेखि अहिलेसम्मका तथ्य र प्रमाणहरुले सो कुरालाई प्रष्ट पार्ने दाबी उनले गरे ।
२०१७ सालतिर केशरजंग रायमाझी सामन्तका पक्षमा लाग्दा पुष्पलाल जनताको अधिकारका लागि लडेको सन्दर्भ उनले जोडे । उनले ती दुवै नेतालाई उस्तैउस्तै भन्न नमिलेजस्तै ओलीलाई देखाएर अरु नेता पनि उस्तै हुन् भन्न नमिल्ने बताए ।
प्रचण्डले जनताका पक्षमा प्रतिबद्ध भइ आफ्ना नेताहरुलाई आन्दोलित गराइराख्न युवा विद्यार्थीको महत्वपूर्ण भूमिका रहने बताए । प्रचण्डले ओलीलाई‘खलपात्र’को संज्ञा दिँदै उनी क्रमिकरुपले चारैतिर घेरामा परिसकेको र आफूहरु शक्तिशाली बन्दै गएको जिकिर गरे । विद्यार्थी नेताहरुले पनि ओलीको कुशासन समाप्त गरेर सुशासन ल्याउनुपर्ने उनले बताए ।
