नारायणगढ : चितवन महोत्सवमा स्टल राखेका व्यवसायीहरुलाई आधा (५० प्रतिशत) रकम फिर्ता गर्ने निर्णय गरिएको छ । चितवन महोत्सव मूलआयोजक समितिको मंगलबार बसेको बैठकले यस्तो निर्णय गरेको हो ।वढ्दो कोरोना भाइरसको तेस्रो लहर (ओमिक्रोन) को महामारी फैलन सक्ने भन्दै मंगलबार उद्योग बाणिज्य संघ चितवनले बैठकबाट यस्तो निर्णय गरिएको मूल आयोजक समिति संयोजक राजु श्रेष्ठले बताउनुभयो ।

चितवनका प्रमुख जिल्ला अधिकारी आस्मान तामाङको नेतृत्वमा सोमबार जिल्ला कोभिड–१९ संकट व्यवस्थापन समन्वय केन्द्र र सर्वदलीय बैठकले जारी व्यवस्थापन समय सहित चितवन महोत्सव दुईदिन चल्न दिने र अरु महोत्सव रोक्ने निर्णय गरेको थियो ।

उद्योग वाणिज्य संघ चितवनको आयोजनामा चितवन महोत्सव आइतबारदेखि नारायणी नदी किनारमा सुरु भएको हो । माघ ४ गतेसम्म चल्ने गरी सुरु भएको महोत्सव चौथो दिनमै समापन गरिने भएको छ ।