गैँडाकोट । गण्डकी प्रदेशको ‘लाइफलाइन’ मानिएको दुम्किबास–त्रिवेणी सडक खण्डको वातावरणीय प्रभाव मूल्याङ्कन (EIA) को काम तत्काल अगाडि बढ्ने भएको छ। लामो समयदेखि प्रतिक्षा गरिएको यो आयोजनामा प्रधानमन्त्री बालेन शाहले विशेष चासो देखाएपछि यसले गति लिन लागेको हो।

 नवलपुर क्षेत्र नं. २ का प्रतिनिधि सभा सदस्य मनिष खनालका अनुसार, प्रधानमन्त्री सचिवालयको प्रत्यक्ष समन्वयमा रोकिएको ईआईएको काम अब तीव्र गतिमा अघि बढाइनेछ। सडक विभागले यसअघि नै ईआईएको अनुमति पत्र प्राप्त गरिसकेको भए पनि विभिन्न कारणले काम सुरु हुन सकेको थिएन। तर, अहिले प्रधानमन्त्रीको निर्देशन र चासोपछि प्राविधिक प्रक्रियाहरू तत्काल सुरु हुने निश्चित भएको छ।

 यो सडक खण्ड निर्माण हुनु गण्डकी प्रदेशका लागि रणनीतिक रूपमा अत्यन्त महत्त्वपूर्ण छ। यो खण्ड तयार भएमा गण्डकी प्रदेशको भारतसँग सिधा व्यापारिक र भौतिक पहुँच स्थापित हुनेछ। हाल यो सडक नहुँदा नवलपुरको दुम्किबासबाट त्रिवेणी नाका पुग्न लुम्बिनी प्रदेशको बाटो भएर करिब ४५ किलोमिटर घुमाउरो यात्रा गर्नुपर्ने बाध्यता छ।

 यसअघि सडक विभागले ईआईए अगाडि बढाउने निर्णय गरे पनि कार्यान्वयनको तहमा ढिलाइ हुँदै आएको थियो। स्थानीय बासिन्दा र जनप्रतिनिधिहरूले लामो समयदेखि यो सडक निर्माणको माग गर्दै आएका थिए। सडक बनेपछि दूरी छोटिनुका साथै गण्डकी प्रदेशको आर्थिक विकासमा ठुलो टेवा पुग्ने अपेक्षा गरिएको छ।