पर्वत,जेठ ९- कुनै पनि राजनीतिक पदमा निर्वाचित भएपछि वा नियुक्त भएपछि कृषि पेशा छाडेका उदाहरण थुप्रै भेट्न सकिन्छ। तर पर्वतको फलेवास नगरपालिकाका उपप्रमुख शोभाकुमारी क्षेत्रीले राजनीतिसँगै कृषि पेशालाई समेत निरन्तरता दिएकी छिन्। फलेवास नगरपालिका १० कुर्घाकी क्षेत्रीले व्यावसायिक काँक्राखेती गर्दै आएको छिन्। उनको काँक्राखेती हरियो काँक्रा उपभोग गर्नका लागि नभई भक्तपुरे लोकल जातको काँक्राको मूल बीउ उत्पादनका लागि हो।

‘म दिउँसो नगरमा भए पनि साँझबिहान गाईगोठ र खेतबारीमै हुन्छु। मैले भोग्ने दैनिक समस्या नगरवासीका साझा हुन् । त्यसैले नगरमा धेरैजसो किसानकै मुद्दा र आवाज उठाउने गरेकी छु’, उनी भन्छिन्। दुई दशकदेखि व्यावसायिक कृषिमा होमिएकी क्षेत्रीले तीन वर्षअघिसम्म व्यावसायिक गाईपालन गर्थिन्। उनले १५ वटासम्म गाई पालेर दैनिक झण्डै १०० लिटर दूध बिक्री गर्थिन्।। २०७९ सालको निर्वाचनमा फलेवास नगरपालिकाको उपप्रमुखमा विजयी भएपछि व्यस्तताका कारण उनी व्यावसायिक गाईपालन छाडेर काँक्राखेतीमा लागेकी हुन्।

क्षेत्रीले २०५६ सालदेखि व्यावसायिक गाईपालन र तरकारीखेती गर्दै आएकी हुन्। अहिले उनले सात रोपनी क्षेत्रफलमा व्यावसायिक काँक्राखेती गरेकी छिन्। हरेक वर्ष पाँचदेखि सात लाखसम्मको काँक्राको बीउ बिक्री गर्ने गरेको उनले बताइन्।

यो पेशामा उनलाई श्रीमान् सोमबहादुरले साथ दिएका छन्। ‘जनताको सेवा गरेर बचेको समय कृषिकर्ममा लगाउने गरेकी छु’, उनी भन्छिन्, ‘जनप्रतिनिधिको कर्मचारीजस्तो बिहान १० देखि साँझ ५ बजेसम्मको कार्यसमय हुँदैन, साँझबिहान जतिबेला पनि जनताको सेवामा जानुपर्छ, कहिलेकाहीँ खाली रहेको समय तरकारी र गोठमा पालेका वस्तुभाउको स्याहारसुसारमा पनि लाग्ने गरेकी छु।’

शुरूमा होटल व्यवसाय गरेकी क्षेत्रीले किराना पसलसँगै शुरू गरेको होटलमा दूधको माग बढेपछि गाई पाल्न थालेकी हुन्। २०७० मा चिर्दीमा चिसापानी दुग्ध सहकारी दर्ता गर्दा उनी त्यसको संस्थापक सचिव थिइन्। २० जना शेयर सदस्यबाट पाँच हजारका दरले लगानी गरेर दूधलाई व्यावसायिक रूपमा बजार पठाउन सहकारीमा आबद्ध गर्नुभएकी क्षेत्रीको पहलमा अहिले उक्त गाउँका झण्डै ७०० किसानले व्यावसायिक पशुपालन गरेर दूध बिक्री गर्दै आएका छन् ।

काँक्रासँगै क्षेत्रीले टनेलभित्र टमाटर र मौसमअनुसारका तरकारी उत्पादन गर्दै आएकी छिन्। गाउँ छोडेकाको खेत भाडामा लिएर जेठो बूढो धानको बीउ उत्पादन गरेर बिक्री गर्छिन् । क्षेत्रीबाट प्रेरित भएर गाउँलेसमेत काँक्राको व्यावसायिक उत्पादनमा लागेका छन्। रासस