चितवन, २४ चैत । मानव बेचबिखन तथा ओसारपसार र लैंगिक हिंसा नियन्त्रणमा सबै साथ आवश्यक रहेकोमा सरोकारवालाहरुले जोड दिएका छन् । माइती नेपालको ३३ औँ वार्षिकोत्सवको अवसरमा आज भरतपुरमा आयोजित अन्तरसंवादमा सरोकारवालाहरुले सबैको साथ र सहयोगले मानव बेचबिखन तथा ओसारपसार र लैंगिक हिंसा नियन्त्रण गर्न सकिने बताएका हुन् ।

माइती नेपाल चितवनले आयोजना गरेको कार्यक्रममा जिल्ला प्रहरी कार्यालय चितवनकी प्रहरी निरीक्षक निलम तामाङले प्रहरीको एक्लो प्रयासले मानव बेचबिखन नियन्त्रण गर्न नसकिने बताउनुभयो । होटलबाट यौन व्यवसायमा संलग्न महिलाहरुलाई उद्धार गरेर होटल सञ्चालकलाई कारबाही गर्न खोज्दा पीडित महिलाले उजुरी नै नदिने गरेको तामाङको भनाइ छ । घटनाको बारेमा कुनै महिलाले जाहेरी दिए पनि मुद्दा तयार पारेर अदालतमा पुग्ने बेलासम्म पीडितले बयान नै परिवर्तन गरिदिने अवस्था रहेको उहाँले बताउनुभयो ।

बेसाहारा एवम् अभिभावकविहीन महिलाहरु बढी पीडित हुने गरेको पाइएको उहाँको भनाइ छ । पीडितले जाहेरी दिएको अवस्थामा पीडकलाई मानव बेचबिखनको मुद्दा लगाएर कारबाही गर्न सकिने अवस्था रहे पनि पीडितले साथ नदिँदा दोषिहरु पर्याप्त प्रमाण नपुगेको भन्दै छुट्ने गरेका तामाङले बताउनुभयो । यस आर्थिक वर्षमा चितवनमा मानव बेचबिखन विरुद्धको एउटा मुद्दा अदालतमा दर्ता गरिएको उहाँको भनाइ छ ।

कार्यक्रममा श्रमिक नेपालकी अध्यक्ष सावित्री पौडेलले मनोरञ्जन क्षेत्रसँगै अन्य श्रम क्षेत्रमासमेत महिलाहरु शोषणमा पर्ने गरेको बताउनुभयो । रोजगार जोगाउन तथा रोजगार गुम्दा दैनिक गुजारा चलाउनसमेत महिलाहरु शोषणमा पर्ने गरेका पौडेलको भनाइ छ । श्रमिकहरु बेचबिखनमा पर्ने, यौन हिंसामा पर्ने गरेको गुनासा आइरहने भन्दै उहाँले उनीहरुलाई मनोपरामर्श प्रदान गरी पीडितलाई कानुनी कठघरामा उभ्याउन पहल गर्नुपर्नेमा जोड दिनुभयो ।

कार्यक्रममा सामुदायिक महिला सेवा समाजका अध्यक्ष महेशकुमार यादवले गरिबीका कारण यौनजन्य हिंसामा परेर पनि घटना सार्वजनिक नहुने गरेको बताउनुभयो । पीडितलाई मनोपरामर्श प्रदान गर्दै प्रमाण पु¥याएर अदालत समक्ष मुद्दा दायर गर्दासमेत पीडितले अदालतमा बयान दिने बेलामा पुरानो बयान फेर्ने गरेका यादवले बताउनुभयो ।

कार्यक्रममा माइती नेपाल चितवनका कार्यक्रम संयोजक ईश्वर गिरीले माइती नेपाल र यसले गर्ने कामको बारेमा जानकारी गराउनुभएको थियो । माइती नेपालले सन् २०२४ मा गरेका कामहरु बारे उल्लेख गर्दै गिरीले चितवन शाखाले एक वर्षमा एक सय १८ जनालाई सिमानाबाट घर फर्काइएको बताउनुभयो । १२ जनाको उद्धार, ८७ जना महिला बालबालिकालाई तालिम, एक सय १५ घरधुरीमा सचेतनामूलक घरदैलो तथा एक सय ६१ जनालाई सेल्टर सुविधा दिएको गिरीले बताउनुभयो ।

यसैबीच, माइती नेपाल चितवन शाखाकी सुरक्षा कर्मचारी राधिका थापाले उत्कृष्ट काम गरेको भन्दै वार्षिकोत्सवको अवसरमा सम्मानित गरिएको थियो । कार्यक्रममा मानव बेचबिखन विरुद्धको क्षेत्रमा कार्यरत संघसंस्थाका प्रतिनिधि तथा पत्रकारहरुको उपस्थिति रहेको थियो ।