गोल्डेन इमिनेन्ट २६औं माडी गोल्डकप अन्तर्राष्ट्रिय आमन्त्रण नकआउट फुटबल प्रतियोगिताको उपाधि प्याराडाईज युथ क्लब, रत्ननगरले जितेको छ ।

शनिबार सम्पन्न फाइनलमा अफ्रिकी टोली माबोयी फुटबल क्लब, बुर्किना फासोलाई शून्यका विरुद्ध ४ गोलको अन्तरले हराउँदै प्याराडाईज माडी गोल्डकपको च्याम्पियन बनेको हो ।

माडीकाे बसन्तपुर खेलमैदानमा भएको फाइनल खेलमा प्याराडाईजका लागि मौसम सुब्बा र दिपेश आले मगरले समान २–२ गोल गरे । प्याराडाईजका दिपेश आले मगर फाइनल खेलको म्यान अफ दि म्याच र बेष्ट गाेलकिपर अभिषेक बराल घाेषित भए ।

विजेता बनेको प्याराडाईजले उपाधिसहित नगद ३ लाख र उपविजेता अफ्रिकी टोली माबोयीले १ लाख ५० हजारसहित ट्रफी, मेडल र प्रमाणपत्रमा प्राप्त गरेका छन् । विजेता र उपविजेता टीमलाई माडी नगरप्रमुख ताराकुमारी काजी महतो र गोल्डेन इमिनेन्ट इन्टरनेशनलका सञ्चालक प्रकाश रिजाल लगायतले पुरस्कार एवं प्रमाण-पत्र वितरण गर्नुभयो ।

बसन्तपुर युनाइटेड क्लब, बसन्तपुर बजार, चितवनको आयोजनामा माघ ६ गतेदेखि शुरु भएको प्रतियोगितामा कुल ८ टोलीहरुले सहभागिता जनाएका थिए ।