चितवन : प्रदेशसभा अन्तरगत चितवन क्षेत्र नं. ३ (क)मा राष्ट्रिय प्रजातन्त्र पार्टीका गिर बहादुर (ज्ञानुजंग) तामाङ बिजयी हुनुभएको छ ।

बिहीबार बिहान ३ः३० बजे सकिएको सो प्रदेशसभा निर्वाचन क्षेत्रको मतगणना अनुसार १७८१३ मत पाएर तामाङ प्रदेशसभा सदस्य निर्वाचित हुनुभएको हो ।

उहाँको निकटतम् स्पर्धीमा लोकतान्त्रिक बाम गठबन्धन अन्तरगत नेपाली काँग्रेसका प्रा.डा. सुर्यकान्त घिमिरेले १४९५६ र सो क्षेत्रका पूर्व प्रदेश सांसद पनि रहनुभएका नेकपा (एमाले)का कृष्ण भुर्तेलले ११६२३ मत पाउनुभयो ।

चितवन ३(क) को मतगणना सकिएसंगै अब चितवन ३(ख) को मतगणना सुरु हुँदैछ । प्रतिनिधि सभा (चितवन ३)तर्फ भने राप्रपाकै बिक्रम पाण्डेको फराकिलो अग्रता कायमै छ ।

पाण्डेले १९९२७ मत पाउँदा नेकपा (माओवादी केन्द्र)का डा. भोजराज अधिकारीले ११२९५, राष्ट्रिय स्वतन्त्र पार्टीका जिता बरालले ९३१७ र एमालेको समर्थन पाउनुभएका स्वतन्त्र उम्मेदवार दिनेश कोइरालाले ६११७ मत पाउनुभएको छ ।