चितवन : पूर्वी चितवनको राप्तीमा विभिन्न संस्थाहरुको सहयोगमा आँखा शिविर सम्पन्न भएको छ । सामुदायिक सहयोग केन्द्र, नेपाल बछ्यौली चितवन, राप्ती नगरपालिका वडा नं १ र पिप्ले युवा समाजको संयुक्त आयोजनामा आज शनिबार राप्ती-१ मा आँखा शिविर सञ्चालन गरिएको हो ।
भरतपुर आँखा अस्पतालका आउटरिच कोअर्डिनेटर रमेश घिमेरेको संयोजकत्वमा पाँच जना स्वास्थकर्मीहरुद्वारा सेवाग्राहीको आँखा परिक्षण गरिएको थियो । सो शिविरमा १५८ जनाले आँखा जाँच गराएका थिए भने १४ जनालाई मोतियाबिन्दुको अप्रेशनको लागि भरतपुर आखा अस्पताल लगिएको सामुदायिक सहयोग केन्द्रका व्यवस्थापक बासुदेब अधिकारीले जानकारी दिए । साथै उनीहरुको नि:शुल्क अप्रेसन गरिने पनि उनले बताए ।
राप्ती नगरपालिका वडा नम्बर १ मा आँखामा समस्या भएका व्यक्तिहरु धेरै भएको हुनसक्ने भएकाले विभिन्न संस्थाहरुको सहयोगमा शिबिर संचालन गरिएको पिप्ले युवा समाजका अध्यक्ष अन्जन पाठकले बताए ।
नेत्र ज्योति संघ, हिरालाल सन्तुदेवि प्रधान नेत्र विज्ञान अध्ययन संस्थान र भरतपुर आँखा अस्पतालको प्राविधिक सहयोगमा शिविर सञ्चालन भएको थियो ।
