गैंडाकोट, नवलपरासी (पूर्व) — त्रिभुवन विश्वविद्यालयअन्तर्गत सञ्चालित बीबीएस चौथो वर्षको वार्षिक परीक्षा २०८२ मा गैंडाकोट नमुना कलेजले उत्कृष्ट नतिजा हासिल गरेको छ। कलेजबाट परीक्षामा सहभागी भएका विद्यार्थीमध्ये ८० प्रतिशतभन्दा बढी विद्यार्थी उत्तीर्ण भएका छन्।

कलेजकी छात्रा सुश्मा खरालले ७९.४४ प्रतिशत अंक प्राप्त गर्दै बीबीएस चौथो वर्षमा कलेजतर्फ सर्वाधिक अंक हासिल गरी कलेज टपर बन्न सफल भएकी छन्। त्यस्तै, कलेजका १९ जना विद्यार्थीले ६० प्रतिशतभन्दा बढी अंक प्राप्त गरेका छन्।

कलेजका प्रमुख गोपेन्द्रकेशरी न्यौपानेले विद्यार्थीहरूको निरन्तर मेहनत, शिक्षकहरूको मार्गदर्शन तथा कलेजले उपलब्ध गराउँदै आएको प्रभावकारी शैक्षिक वातावरणका कारण उत्कृष्ट नतिजा हासिल गर्न सम्भव भएको बताउनुभयो। विद्यार्थीको नियमित अध्ययन, शिक्षकहरूको समर्पित अध्यापन र कलेजको शैक्षिक व्यवस्थापनबीचको समन्वयले यस्तो नतिजा प्राप्त गर्न महत्वपूर्ण भूमिका खेलेको उहाँको भनाइ छ।

बीबीएस कार्यक्रमका संयोजक लक्ष्मीकान्त शांखीले विद्यार्थीको मेहनत, विषयगत शिक्षकहरूको निरन्तर मार्गदर्शन र प्रभावकारी शैक्षिक वातावरणले नतिजा सुधारमा महत्वपूर्ण योगदान पुर्‍याएको बताउनुभयो। उहाँको अध्यापन तथा मार्गदर्शनमा रहेको Entrepreneurship (MGT.225) विषयमा परीक्षामा सहभागी शतप्रतिशत विद्यार्थी उत्तीर्ण भएका छन्।

त्यस्तै, लेक्चरर मुक्तिराम तिवारीको अध्यापन तथा मार्गदर्शनमा Corporate Finance (FIN.250) र Management of Financial Institutions (FIN.255) विषयमा परीक्षामा सहभागी सबै विद्यार्थी उत्तीर्ण भएका छन्। दुई वित्तसम्बन्धी विषयमा शतप्रतिशत सफलता हासिल हुनु विषयगत अध्यापन, नियमित अभ्यास तथा विद्यार्थीलाई प्रदान गरिएको निरन्तर मार्गदर्शनको प्रभावका रूपमा कलेजले लिएको छ।

कलेजले उत्कृष्ट नतिजा हासिल गर्ने कलेज टपर सुश्मा खरालसहित सम्पूर्ण विद्यार्थी, विषयगत शिक्षक तथा बीबीएस परिवारलाई हार्दिक बधाई ज्ञापन गरेको छ। साथै, आगामी दिनमा पनि विद्यार्थीलाई गुणस्तरीय शिक्षा, प्रभावकारी विषयगत मार्गदर्शन र उत्कृष्ट शैक्षिक वातावरण उपलब्ध गराउँदै शैक्षिक उपलब्धिलाई थप उचाइमा पुर्‍याउने प्रतिबद्धता कलेजले जनाएको छ।

बीबीएस चौथो वर्षको परीक्षामा प्राप्त यस उपलब्धिले गैंडाकोट नमुना कलेजको शैक्षिक पहिचानलाई थप मजबुत बनाएको कलेजको भनाइ छ।