गैँडाकोट, २६ पुस । नवलपुरको गैँडाकोट–२ स्थित नारायणी नदीकिनारमा सुरु भएको चौथो संस्करणको गैँडाकोट महोत्सवमा आज प्रकाश सपूतसहितका कलाकारहरुको प्रस्तुती रहने जनाइएको छ ।

महोत्सवको सांस्कृतिक कार्यक्रम संयोजक किशोर लम्सालकाअनुसार आज शनिबार महोत्सवको सांस्कृतिक कार्यक्रमको आकर्षणको रुपमा लोकप्रिय गायक प्रकाश सपूतसहित गायिका सीता राजना, गायक तथा प्रस्तोता दीपक खड्का र सन्तोष सुवेदीलगायत स्थानीय तथा ख्यातिप्राप्त राष्ट्रिय कलाकारहरुको सांगीतिक प्रस्तुती रहने छ ।

महोत्सवमा हरेक दिन राष्ट्रिय ख्यातिप्राप्त तथा स्थानीय कलाकारहरुको प्रस्तुती रहने भन्दै लम्सालले महोत्सवकै अवसरमा राष्ट्रिय भजन प्रतियोगितासमेत आयोजना गरिएको जानकारी दिए । लम्सालकाअनुसार महोत्सवमा हरेक दिन हुने सांस्कृतिक कार्यक्रममा समीक्षा अधिकारी, हिमाल सागर, शिव परियार, रमेशराज भट्टराई, मेलिना राई, रचना, रिमाललगायतका कलाकारको प्रस्तुती रहनेछ । महोत्सवमै विशेष भजन प्रतियोगितासहित जातीय नृत्य, विद्यालयस्तरीय नृत्यलगायतका प्रस्तुती रहने लम्सालको भनाइ छ ।

माघ १० गतेसम्म सञ्चालन हुने महोत्सवको दुई लाख दर्शकले अवलोकन गर्ने तथा २५ करोड रुपैयाँको आर्थिक कारोबार हुने अपेक्षा गरिएको छ । महोत्सव प्रवेशका लागि सर्वसाधारणले रु १०० तथा विद्यार्थीका लागि रु ७० को टिकटको व्यवस्था गरिएको छ । त्यस्तै अपाङ्ग तथा ज्येष्ठ नागरिक र शैक्षिक संस्थाबाट संस्थागतरुपमा विद्यार्थीहरुको सहभागिता भएमा उनीहरुलाई निःशुल्क प्रवेश गर्न दिइने आयोजकले जनाएको छ ।