गैँडाकोट, भदौ १५ लायन्स क्लब अफ गैँडाकोट कालीगण्डकीको आयोजनामा १२ वर्षीया सायाँ श्रेष्ठलाई ह्वीलचेयर वितरण गरिएको छ। क्लबका अध्यक्ष शिवप्रसाद भूषालको अध्यक्षतामा गैँडाकोट–१ गंगानगर पीपलडाँडामा आइतबार एक विशेष कार्यक्रमका बीच वितरण कार्य सम्पन्न भएको हो।

कार्यक्रमका प्रमुख अतिथि डिपार्टमेन्ट को–अर्डिनेटर MJF कृष्ण पाण्डे रहेका थिए। त्यसैगरी गैँडाकोट नगरपालिका वडा नं. १ का वडाध्यक्ष सुरेन्द्र रेग्मी विशेष अतिथिको रूपमा उपस्थित रहनु भएको थियो।

अध्यक्ष भूषालले लायन्स क्लबले सामाजिक सेवामार्फत समुदायमा सहयोग पु¥याउने उद्देश्यले निरन्तर कार्यक्रम गर्दै आएको बताउँदै भविष्यमा पनि यस्ता सहयोगमूलक कार्यलाई निरन्तरता दिने प्रतिबद्धता व्यक्त गर्नुभयो। प्रमुख अतिथि पाण्डेले क्लबका गतिविधि समाजमा सकारात्मक प्रभाव पारिरहेको उल्लेख गर्दै सदस्यहरुको सक्रियताप्रति प्रशंसा गर्नुभयो।

यस अवसरमा विशेष रुपमा उल्लेखनीय कुरा भनेको क्लबका सक्रिय सदस्य लोचन सापकोटाको जन्मदिनको अवसर पारेर सो कार्यलाई सम्पन्न गरिएको हो। उपस्थित वक्ताहरुले सापकोटाको समाजसेवाप्रतिको योगदान र जन्मदिनलाई समाजहितमा उपयोग गरेको सराहना गरेका थिए।

कार्यक्रममा क्लबका पदाधिकारी, स्थानीय समुदायका प्रतिनिधि र शुभेच्छुकहरुको उपस्थिति रहेको थियो। ह्वीलचेयर प्राप्त गरेकी सायाँ श्रेष्ठ र उनका परिवारले सहयोगका लागि क्लबप्रति आभार प्रकट गरेका थिए।