काठमाडौं,असार २- काठमाडौंको कलंकीस्थित इडिफाई इन्टरनेसनल स्कुलको कम्पाउन्डमा इभी माइक्रो भ्यान दुर्घटना हुँदा एक विद्यार्थीको मृत्यु भएको छ भने अन्य सातजना घाइते भएका छन्। सोमबार १२ः५० को समयमा स्कुलबाट बाहिर निस्कने क्रममा स्कुलको गेटको पिल्लरमा ठोक्किएर भ्यान दुर्घटनामा परेको हो ।

दुर्घटनामा सर्लाही स्थायी घर भई कुलेश्वर बस्ने ९ वर्षीया सोनाक्षी यादवको उपचारको क्रममा सहिद मेमोरियल अस्पतालमा मृत्यु भएको जिल्ला प्रहरी परिसर, काठमाडौंले जनाएको छ । दुर्घटनामा सर्लाहीको लालबन्दी स्थायी घर भएकी आठ वर्षीया रेश्मा मोक्तान, रामेछापकी ९ वर्षीया नेसिया थापा, कीर्तिपुरकी नौ वर्षीया निशिका डंगोल, मकवानपुरकी ११ वर्षीया सिमरन खडका, गुल्मीकी नौ वर्षीया प्रेमिसा घर्तीमगर घाइते भएका छन्।

सो विद्यालयका प्रध्यानाध्यापक तनहुँ स्थायी घर भएका ४६ वर्षिय सुरज पोख्रेल तथा गाडीचालक धनुषाका ६० वर्षिय हर्कबहादुर कार्की पनि घाइते भएका छन् । गाडीमा चालक मात्र सवार थिए। प्रध्यानाध्यापक तथा बिद्यार्थीहरु स्कुलको गेट छेउमा रहेकोमा ठक्कर दिएको एसपी अपिलराज बोहराले बताए।

प्रहरीका अनुसार चार दिनअघि मात्र बिद्यालयले सो इभी भ्यान खरिद गरेको थियो । चालक इभी गाडी चलाउन अभ्यस भइसकेका थिएनन् । जसकारण दुर्घटना भएको आकलन गरिएको छ । सो गाडीमा अभ्यस्त नहुँदा एक्सिलेटर थिच्ने बित्तिकै गाडी हुत्तिएर दुर्घटना भएको चालकले बताएका छन् ।