चितवन, जेठ २८  एक्सपर्ट एजुकेसनसँगको सहकार्यमा नारायणी एडभर्टाइजिङ एण्ड इभेन्ट्सले आयोजना गरेको डिजिटल वक्तृत्वकला प्रतियोगितामा विद्यार्थीले सहभागिता जनाइरहेका छन् । भर्खरै सम्पन्न कक्षा १२ को परीक्षा दिएर बसेका विद्यार्थीले सहभागिता जनाउन पाउने प्रतियोगिताको नाम ‘एक्सपर्ट स्पिच स्टार–२०८२’ राखिएको छ ।

‘आजको आवश्यकताः गुणस्तरीय र व्यवहारिक शिक्षा’ शीर्षकमा आयोजित प्रतियोगिता एक्सपर्ट एजुकेसन एण्ड भिजा सर्भिसेज चितवनले प्रस्तुत गरेको हो । प्रतियोगितामा चितवन, नवलपरासी(सुस्तापूर्व) र मकवानपुरबाट यसैपालि कक्षा १२ को परीक्षा दिएका विद्यार्थीले मात्र सहभागिता जनाउन पाउने छन् । आगामी असार १५ सम्म घरै बसेर खिचेका ५ मिनेटसम्मका भिडियो गुगल फर्ममा अपलोड गर्नुपर्ने हुन्छ । विद्यार्थीले नहल्लाइ राम्रो आवाज आउने गरी भिडियो खिच्नुपर्ने हुन्छ ।

त्यसलाई एक्सपर्ट एजुकेसन एण्ड भिजा सर्भिसेज चितवनको फेसबुक पेजमा अपलोड गरिने छ । त्यसका आधारमा भिडियोको मूल्यांकन गरिने छ । भिडियोको विषयवस्तु र प्रस्तुतीकरणलाई ७५ तथा फेसबुकमा आएको लाइक र शेयरलाई २५ नम्बरमा मूल्यांकन गरिने नारायणी एडभर्टाइजिङ एण्ड इभेन्ट्सका अध्यक्ष राजु चौधरीले जानकारी दिए । उनका अनुसार विद्यार्थीले नेपाली वा अंग्रेजी माध्यममा भिडियो बनाउन सक्ने छन् । सुरुमा जेठ २३ सम्म अवधि तोकिएको प्रतियोगितामा धेरै विद्यार्थीलाई सहभागी गराउने उद्देश्यले भिडियो पठाउने अवधि बढाएर असार १५ पु¥याइएको हो ।

नतिजा घोषणा आगामी साउन १५ गते गरिने छ । प्रतियोगितामा सर्वोत्कृष्ट हुनेलाई नगद २५ हजार रुपैयाँ पुरस्कार प्रदान गरिने छ । उत्कृष्ट एकजनालाई १५ हजार र उत्तम ठहरिने ३ जनालाई जनही ५ हजार रुपैयाँ पुरस्कार प्रदान गरिने छ । सहभागी सबैले एक्सपर्टका तर्फबाट आकर्षक गिफ्ट ह्याम्पर पाउने एक्सपर्ट चितवनका बिजनेस डेभलपमेन्ट म्यानेजर विनोदबाबु रिजालले जानकारी दिए । उनले परीक्षापछिको खाली समय सदुपयोग गर्दै आफ्नो कला प्रस्तुत गर्न सबै विद्यार्थीलाई अनुरोध गरे ।