नवलपुर, २० मंसिर । नेपाल उद्योग वाणिज्य महासंघ गण्डकी प्रदेशले जिल्लाभित्र हुने हरेक प्रकारका मेलामहोत्सवमा पहिलो अधिकार आफूहरुको हुनुपर्ने भन्दै नवलपुरका प्रमुख जिल्ला अधिकारीलाई ध्यानाकर्षण गराएको छ ।
अध्यक्ष अमृत भट्टचनको नेतृत्वमा आज गएको जिल्ला र नगर उद्योग वाणिज्य संघको टोलीले पछिल्लो समय जहाँ जसले पनि मेला महोत्सव गरेको भन्दै ध्यानाकर्षण गराएका हुन् । जिल्लाभित्रका उद्योग वाणिज्य संघहरूले मात्र मेला महोत्सवहरु सञ्चालन गर्न पाउने व्यवस्था गर्न व्यवसायीहरुले माग गरेका छन् । आफूहरुले मेला महोत्सव सञ्चालन गर्दा स्थानीय निकायहरुको बोलबाला कम् हुने, राजस्व संकलन बढ्ने, सुरक्षालाई मध्यनजर हुने बताएका छन् ।
प्रदेश अध्यक्ष भट्टचनको नेतृत्वमा जिल्ला उद्योग वाणिज्य संघ गैँडाकोट, देवचुली उद्योग वाणिज्य संघ, नवलपुर उद्योग वाणिज्य संघ, मध्यविन्दु उद्योग वाणिज्य संघका प्रतिनिधिहरु सहभागी थिए । उनीहरुले ज्ञापनपत्रमा बुटवल नारायणगढ सडक विस्तारको काम चाँडो गराउन निर्देशन दिन र समन्वय गर्न समेत प्रमुख जिल्ला अधिकारकिो ध्यानाकर्षण गराएका छन् । व्यवसायीको टोलीले दुम्कीबास त्रिवेणी सडक निर्माण गर्न भूमिका खेल्न, धौवादी फलाम खानीको उत्खनन गर्न, लोकाहामा निर्माण हुने औद्योगिक क्षेत्र निर्माणको कामलाई तीव्रता दिन माग गरेका छन् ।
नवलपुरको मुख्य राजमार्गको दुरावस्थाका कारण पर्यटकहरू दिनानुदिन भ्रमण रद्द गरेका उनीहरुको भनाइ छ । भैरहवा भन्सार, त्रिवेणी भन्सार हुँदै भित्रिने सवारी तथा अन्य साधनहरु यात्रा अवधि नै अनिश्चित बनेको ध्यानाकर्षणपत्रमा जनाइएको छ । जिल्लाभित्र रहेको ८ वटै स्थानीय तहहरुले त्यस नारायणगढ बुटवल सडक आयोजनालाई विभिन्न निर्माण सामग्री सुविधामा उपलब्ध गराउँदासमेत निर्माणमा ढिलाइ भइरकेकोप्रति प्रमुख जिल्ला अधिकारी अरुण पोखरेलको ध्यानाकर्षण गराइएको हो ।
