चितवन, भदौ ४-

चितवन, ४ भदौ । टिकौली जंगलमा दुर्घटना गराउने अक्सफोर्ड कलेज गैंडाकोटका बस चालकले गाँजा खाएको पुष्टि भएको छ । २० जना घाईते हुने गरी भएको दुर्घटनाका चालकमाथि गरिएको मादक पदार्थ सेवन र लागू पदार्थ सेवन जाँचका क्रममा गाँजा खाएको पुष्टि भएको हो ।

गत साउन ३१ गते पूर्व–पश्चिम राजमार्गको भरतपुर महानगरपालिका वडा नं. ९ टिकौली जंगलमा भएको दुर्घटनामा कलेजको ना १ क ६१३१ नम्बर बसले ना २ च ८४४६ नम्बरको शव बोकेर देवघाटतर्फ जाँदै गरेको बोलेरो र ६ वटा मोटरसाइकल र स्कूटरलाई ठक्कर दिएको थियो । उक्त दुर्घटनामा २० जना घाईते भएका थिए ।

जिल्ला प्रहरी कार्यालय चितवनका प्रमुख एसपी रामेश्वर कार्कीका अनुसार रगतमा मादक पदार्थ र लागू पदार्थ परीक्षणको क्रममा चालकले गाँजा खाएको पुष्टि भएको हो । प्राप्त प्रमाणहरु अदालतमा पेश गरिने उहाँको भनाई छ । चितवन प्रहरीले पछिल्लो समयमा दुर्घटना भएमा शंका लागेको अवस्थामा मादक पदार्थ सेवन र लागू पदार्थ सेवन जाँच गराउने गरेको छ ।

दुर्घटनामा घाइते भएका २० जना मध्ये १६ जनाको अझै उपचार भईरहेको छ । चितवन मेडिकल कलेजमा ५ जना, कलेज अफ मेडिकल साईन्सेस शिक्षण अस्पताल (पुरानो मेडिकल कलेज) मा ७ जना, भरतपुर अस्पतालमा तीन जनना र काठमाण्डौंको मेडिसिटी अस्पतालमा एक जनाको उपचार भईरहेको छ ।

विद्यार्थीलाई शिक्षा दिने कलेजमा कार्यरत चालकले नै मादक पदार्थ सेवन गरी सवारी चलाउँदा त्यसको प्रत्यक्ष प्रभाव विद्यार्थीमा पर्ने भन्दै अभिभावकहरु चिन्तित बनेका छन् ।