चितवन – बंगलादेशमा सम्पन्न महिला साफ यू १५ च्याम्पियनसिप विजेता खेलाडीहरुलाई चितवनमा स्वागत गरिएको छ । महिला फुटबलमा नेपालले पहिलो पटक उपाधि जित्दाको दुई मुख्य खेलाडी र गोलकिपर प्रशिक्षकलाई हिजो (सोमबार) चितवनमा स्वागत गरिएको हो । चितवन जिल्ला फुटबल संघले एक कार्यक्रमकाबीच गोलकिपर प्रशिक्षक छन्नुराम चौधरी, कप्तान तथा गोलकिपर सुजाता तामाङ र बंगलादेशविरुद्ध गोल गरेकी सुशील केसीलाई स्वागत गरेको हो ।
चितवन जिल्ला फुटबल संघका अध्यक्ष श्री कृष्ण कार्कीले सुजता र सुशीलाले चितवनसँगै देशकै शिर उच्च पारेको बताए । संघले छिट्टै खेलाडीद्धय र प्रशिक्षकलाई नगदसहित सम्मान गर्ने कार्कीले बताए ।उनले खेलाडीद्धयलाई आगामी दिनमा आवश्यक हरेक किसिमका सहयोग गर्न संघ सधैं तयार रहने बताए । कार्कीले खेलाडीलाई चाहिने न्युनतम आधारभूत आवश्यकताको अभावमा खेल छोड्नुपर्ने अवस्था आउन नदिने प्रतिवद्धता जनाए ।
गोलकिपर प्रशिक्षक चौधरीले छोटो तयारीका बाबजुत खेलाडीहरुले ईतिहास रचेको भन्दै खुशी व्यक्त गरे । खेलाडीहरुले आफ्नो मेहेनतको फल प्राप्त गरेको उनको भनाइ थियो । सुजाता र सुशीला चितवनको मात्र नभई देशकै सान भएको उनले बताए । कप्तान तथा गोलरक्षक सुजाताले देशको लागि उपाधि जित्दा पाउँदाको क्षण शब्दमा बयान गर्नै नसक्ने बताईन् । पहिलो पटक राष्ट्रिय टिमको जर्सी लगाएर उपाधि जित्दाको क्षण सम्झिदै उनले भनिन्, ‘खेल जित्दाको क्षण निकै अविस्मरणिय छ । खुशीको आँशुनै आयो । गुरुहरुलाई सम्झिए । उहाँहरुले नसिकाउनु भएको भए सायद सम्भव थिएन । मेरो परिवारको साथ र सहयोगले पनि यो सम्भव भयो । आमा बुबाको नाम पनि राख्न सके ।’ सुजता प्रतियोगिताभरको उत्कृष्ट गोलकिपर घोषित भएकी थिईन् ।
बंगलादेशविरुद्धको खेलको गोल स्कोरर सुशीलाले नेपाली महिला टिमको उपाधि खडेरी टार्न पाउँदा निकै खुशी लागेको बताईन् । गोल गरेर नेपाललाई उपाधि जिताउन पाउँदा झनै खुशी लागेको उनले बताईन् । उनले अब सिनियर टिमबाट खेल्नका लागि कडा मेहेनत गर्ने बताईन् ।खेलाडीद्धयको स्थानीय प्रशिक्षक चितवन जिल्ला फुटबल संघका प्रशिक्षक सुमन श्रेष्ठले दुबै खेलाडीले प्रतियोगिताभर उत्कृष्ट प्रदर्शन गरेको बताए । हरेक खेलमा उनीहरुको खेल सुधारिएको उनले बताए । खेलाडीहरुको उपाधिको भोकले यो सफलता हात पार्न सकेको उनको भनाइ थियो ।
नेपाललाई उपाधि जिताउन चितवनका खेलाडीद्धयको प्रदर्शन उत्कृष्ट रहेको भन्दै खुशी व्यक्त गरे । उनीहरुलाई निरन्तर खेल्ने वातावरण बनाउन आफ्नो र संघको तर्फबाट सक्दो सहयोग रहने उनले प्रतिवद्धता जनाए । सुजता र सुशीला सुमनकै उत्पादन हुन् ।डबल राउन्ड रोविनका आधारमा भएको च्याम्पियनसिप अपराजित रहँदै नेपाल च्याम्पियन बनेको हो । अन्तिम खेलमा नेपाललाई एक कम्तिमा एक अंक आवश्यक थियो । उक्त खेलमा नेपालले बंगलादेशलाई १-१ को बराबरीमा रोकेको थियो ।
१४औं मिनेटमा नेपालले सुशीलाको गोलमा १–० को अग्रता लिएको थियो । ५४ औं मिनेटमा बंगलादेशले बराबरी गोल गरेको थियो । खेलको अन्तिम मिनेट बंगलादेशले पेनाल्टी पाएको थियो । जसलाई सुजाताले बिफल तुल्याउदै नेपाललाई च्याम्पियन बनाएकी थिईन् ।
