चितवन, असार १२–

चितवनमा पछिल्लो तीन महिनामै सवारी दुर्घटनाबाट ३४ जनाको मृत्यु भएको छ । बढ्दो सवारी चाप र सवारी चालकको लापरवाहीका कारण दुर्घटना समेत बढ्दो क्रममा रहेको छ ।

जिल्ला ट्राफिक प्रहरी कार्यालय चितवनका अनुसार गत चैत, वैशाख र जेठ महिनामा १४१ वटा दुर्घटना हुँदा ३४ जनाको मृत्यु भएको हो । सबैभन्दा धेरै चैत महिनामा १६ जनाको मृत्यु भएको छ । सो महिनामा ३७ वटा दुर्घटना भएका थिए । ती दुर्घटनामा परेर ११५ जना घाइते समेत भएका छन् ।

गत जेठ महिनामा ४१ वटा दुर्घटना हुँदा १० जनाको मृत्यु भएको छ । ती दुर्घटनामा परेर ९१ जना घाइते भएका छन् । वैशाख महिनामा सबैभन्दा धेरै ५३ वटा दुर्घटना भएका छन् । तर यस दुर्घटनामा मृतकको संख्या घटेर ८ मात्रै रहेको छ । उक्त महिनामा ११५ जना घाइते भएका थिए ।

जिल्ला ट्राफिक प्रहरी कार्यालय चितवनका प्रमुख धर्मबहादुर अधिकारीले दुर्घटनाको संख्या घटबढ हुँदै आइरहेको भन्दै सवारी चालकले सचेत भएर सवारी साधन चलाए आफै दुर्घटना न्यूनीकरण हुने बताए । उनले क्षमता भन्दा बढी यात्रु चढाउने सवारी साधनहरुलाई कारवाही गर्दै आइरहेको भन्दै स्वंम चालक सचेत नभएसम्म समस्या बल्झिरहने बताए । ‘तीव्र गति र सिट क्षमता भन्दा धेरै यात्रुका कारण पनि दुर्घटनाहरु बढेको देखिन्छ, न्यूनीकरणका लागि हामीले जनचेतना जगाउने काम पनि गर्दै आइरहेका छौं’–प्रमुख अधिकारीले भने ।

तीन महिनामा ७६ लाख बढी राजश्व संकलन

जिल्ला ट्राफिक प्रहरी कार्यालय चितवनले सवारी कारवाहीलाई तिव्रता दिएको छ । कार्यालयका अनुसार पछिल्लो तीन महिनामै ८ हजार २६४ सवारीलाई कारवाही गरिएको छ । जसअनुसार चैतमा २ हजार ५२६, वैशाखमा २ हजार ५२८ र जेठ महिनामा ३ हजार २१० सवारीलाई कारवाही गरिएको छ ।

कारवाही बापत ट्राफिक प्रहरीले राजश्व समेत उठाउँदै आइरहेको छ । तीन महिनामै कार्यालयले कारवाही बापत ७६ लाख ४९ हजार ५०० रुपैयाँ राजश्व संकलन गर्न सफल भएको छ । सबैभन्दा धेरै जेठमा ३० लाख ५ हजार, वैशाखमा २३ लाख ३९ हजार ५०० र चैतमा २३ लाख ९ हजार ५ सय रुपैयाँ राजश्व संकलन गरेको छ ।