चितवन : छोरा नै किरियापुत्री बस्नुपर्ने मान्यतालाई चितवन माडीका दुई दिदी-बहिनीले तोडेका छन् । दिवंगत बुबाको किरियापुत्री बस्दै उनीहरूले समाजमा छोरीमाथिको भेदभावविरुद्ध सन्देश दिएका हुन् । ९ जेठमा निधन भएका चितवनको माडी नगरपालिका-८ खरकट्टा -(इन्द्रवस्ती)का कृषक फणीन्द्रराज पुरीका दुई छोरीले काजकिरिया गरिरहेका छन् । उनका छोरीहरू २२ वर्षीया रेजिना र २० वर्षीया अनुसा पुरी किरियामा बसेका हुन् । ४८ वर्षीय अगुवा किसानसमेत रहेका फणीन्द्रराज पुरीको बिपी कोइराला मेमोरियल क्यान्सर अस्पताल भरतपुरमा उपचारको क्रममा निधन भएको थियो ।

चार महिनाअघि फोक्सोमा ट्युमर देखिएपछि अस्पतालमा भर्ना गरिएको थियो । बिस्तारै ट्युमर ब्रेनमा फैलियो, त्यसैकारण उनको निधन भयो । पुरी ६ वर्ष अघिदेखि पिसाब थैलीमा भएको ट्युमरसँग लड्दै आएका थिए । ०७३ सालमा उनको पिसाबथैलीमा भएको ट्युमरका कारण पिसाबनली बन्द भएको थियो । चिकित्सकले शल्यक्रिया गरेर पिसाबथैली बाहिर राखिदिएका थिए । यद्यपि उनी रोगलाई भुलेर तरकारी खेती र बाख्रापालनमा व्यस्त थिए । उनको यही मिहिनेतले माडी नगरपालिकाले सम्मान पनि गरेको थियो ।

उनको निधनपछि आमा सीता पुरीसँगै दुई छोरीले धार्मिक विधिअनुसार किरिया गरिरहेका छन् । दुवै छोरीले देवघाटमै पुगेर बाबुलाई दागबत्ती दिएका थिए । बुबा मिहिनेती हुनुहुन्थ्यो । पछिल्लो चार महिना बुबा बिरामी हुँदा हामी दिदी बहिनी सँगै अस्पतालमा उहाँको हेरचाहका लागि बस्यौँ,विगतमा अरू ठाउँका छोरीले किरिया बसेको देखेको बताउँदै रेजिनाले भनिन्, हामी आफैँ किरिया बसेका हौँ । बुबाको हेरचाह गर्न सक्ने हामी बुबाको संस्कार पनि त गर्न सक्छौँ । छोरीले बाबुको मलामी जानुहुँदैन र किरिया गर्नुहुँदैन भन्ने गलत मान्यता हो,उनले भनिन्, मेरो बुबाको सन्तान बहिनी र म मात्र हौँ, बुबाले हामीप्रति गरेको त्यागको सम्मान गर्दै किरिया बस्ने निर्णय गरेका हौँ ।

उनीहरू किरिया बस्दा आफन्त र छिमेकीले पनि सहजीकरण गरे । स्वयं परिवार र आफन्तले परिवर्तन ल्याउनुपर्छ भनेर प्रशंशा गर्नुभयो । पण्डित बाजेले बस्न मिल्छ, अन्त पनि बसेका छन् । आफ्नो बुबाको किरिया आफैँ बस्दा झन्रा म्रो हुने भनेपछि आफ्नाे चाहनामा थप सहजता भएको उनले सुनाइन् ।