ललितपुर : ललितपुरको  उम्मेदवार बाबुराज बज्राचार्यले कांग्रेसबाट धोका भएको वताएका छन् । गठबन्धनका माओवादी केन्द्रबाट उपमेयरका उम्मेदवार बज्राचार्यले कांग्रेसले गठबन्धनका नाममा धोका दिएको आरोप लगाएका हुन् ।

ललितपुर महानगरपालिकाको मेयरमा कांग्रेसका चिरीबाबु महर्जनले अग्रता कायमै राखेका छन् ।

‘मेयर महर्जनले हाम्रो पार्टीको भोट लिए तर हामीलाई भने दिएनन्,’ उनले भने, ‘अब गठबन्धन धेरै दिन टिक्दैन । आफू मात्रै लिने, अरुलाई नदिने गठबन्धनको आयु हुँदैन ।’

महर्जनले भने कांग्रेसले माओवादीलाई धोका नदिएको बताउँछन् । ‘कोठे बैठकमा सँगै थियौं । घरदैलो कार्यक्रममा पनि सँगै थियौँ,’ उनले भने, ‘मेरो लागि मात्र मैले भोट मागेन ।’ उनले मतदान शिक्षा अभाव कारण गठबन्धनबाट उपमेयरका उम्मेदवारलाई भोट नपरेको हुन सक्ने बताए ।

१५ हजारभन्दा बढी मत गणना हुँदा महर्जनले ८५३४ मत पाएका छन् भने उनलाई पछ्याइरहेका एमालेका हरिकृष्ण व्यञ्जनकारले ३७८५ मत ल्याएका छन् ।

०७४ को चुनावमा २४,३१६ मत ल्याएर ३२६ मतले मात्रै हारेका व्यञ्जनकारका लागि यसपटकको गठबन्धन भारी परेको देखिन्छ । म परिणाम सार्वजनिक भइसकेको १,२ ३ वडामा मात्र नभई एमालेको प्यानल नै विजय भएको ५ वडामा पनि उनले महर्जनले भन्दा कम भोट पाएका छन् । यद्यपि हालसम्मको परिणामलाई व्यञ्जनकारले स्वाभाविक रूपमा लिएका छन्, ‘०७४ मा पनि २० वडासम्म गन्दा म निकै पछाडि थिएँ । अन्त्यमा ३२६ मतको मात्रै अन्तर भयो । पछि त्यो पनि कर्मचारीले गडबड गर्दा हारेका थिए, उनले भने, मेरो कोर एरिया आउन बाँकी नै छ ।’

पछिल्लो मतपरिणामअनुसार एमालेकी उपमेयर उम्मेदवार मञ्जली शाक्यले ४३३५ मत ल्याउँदा माओवादीका बज्राचार्यले २७९४ मात्र प्राप्त गरेका छन् । उपमेयरमा कांग्रेसले उम्मेदवार नै नउठाए पनि रुखमा २३३० मत खसेको छ ।