निर्वाचन अधिकृतको कार्यालय गैँडाकोटले निर्वाचन आयोगमा गरेको गलत रिपोर्टिङका कारण गैँडाकोट १८ मा हंगामा मच्चिएको छ । स्थानीय तह सदस्य निर्वाचन २०७९ अन्तगर्त सम्पन्न मतगणनाबाट गैँडाकोट १८ मा नेपाली काँग्रेसको प्यानल नै विजयी भएपनि निर्वाचन आयोगमा अर्को पार्टीको उम्मेदवार विजयी भएको रिपोर्टिङ गरेपछि हंगामा मच्चिएको हो । मतगणनाका क्रममा पार्टीबाट खटिएका प्रतिनिधिले गरेको गणनामा जित शुनिस्चित भएर बाहिरएपनि आयोगमा अर्कै पार्टीका उम्मेदवार विजयी भएको उल्लेख भएपछि हंगामा भएको हो ।
यहाँ नेपाली काँग्रेसको प्यानल नै विजयी भएको थियो । वडा अध्यक्ष पदमा पुनः नेपाली काँग्रेसका उम्मेदवार तिलबहादुर चितौरे (६५२) महिला सदस्यमा टेकमाया सोती (६४३), दलित महिला सदस्यमा तारामाया विश्वकर्मा (६१२), खुल्ला सदस्यमा कर्णबहादुर माकिम मगर (६३५) र चमबहादुर सुनारी (६३०) मतका साथ विजयी भएका हुन् ।
खुल्ला सदस्य पदमा नेपाली काँग्रेसका चमबहादुर सुनारी (६३०) मतका साथ विजयी हुनुपर्नेमा मंगोल नेसनल अर्गनाईजेसनका एकबहादुर आले (३६३) मत सहित विजयी भएको आयोगको वेभसाईटमा उल्लेख गरेपछि निर्वाचित प्रतिनिधिहरुले आक्रोश व्यक्त गरेका छन् ।

खुल्ला सदस्यमा सुनारीको पहिलो ३०० मा (१७५), दोस्रो ३०० मा (१८२) र तेस्रोमा (२७३) गरी तीन चरणको गणना गरी जम्मा मतअंक सार्वजनिक गरिएको भएपनि निर्वाचन आयोगमा अन्तिमको २७३ मतमात्र पठाइएपछि अर्का उम्मेदवार विजयी भएको निर्वाचन आयोगले आफ्नो वेभसाईटमा जनाएको थियो ।
निर्वाचन अधिकृत दीपशिखा मुनाकमीले हस्ताक्षर गरेको गैँडाकोट नगरपालिकाको सूचना पार्टीमा टासिएको अन्तिम मत परिणाममा समेत खुल्ला सदस्यको जम्मा मतभार उल्लेख गरिएको छैन ।
निर्वाचन आयोग नेपालका सूचना अधिकारी एवं सहायक प्रवक्ता सूर्यप्रसाद अर्यालले यस विषयमा थप बुझेर सच्याउने बताउनुभएको छ ।