भरतपुर : चितवनको भरतपुर महानगरपालिका वडा नम्बर २६ मा नेकपा एमालेको तर्फबाट वडा अध्यक्षका उमेदवार भूपालनाथ कँडेल यस भेगको लागि नौलो नाम होइन । मौरीपालन पेशामा संलग्न कंडेल यस भेगको समस्या र सम्भावनासंग परिचित व्यक्ति हुन् । त्यसैले यहाँको विकासका लागि आफ्नो अनुभव र योजना सहित उनी अहिले चुनावी दौडमा निस्किएकाछन् ।

नारायणी नदीमा आउने बाढीले खेत बगाएर बगर बनाउने समस्याका भुक्तभोगि कँडेल आफु वडा अध्यक्ष भए नदी कटानका कारण घरबार विहिनहरुलाई क्षतीपूर्ती सहित दिर्घकालिन तटबन्धनको योजनालाई मुख्य उजेण्डा नै बनाएका छन् । वडाभित्र भूमिहिनहरुलाई बहुआयामिक आवासको परिकल्पनालाई एजेण्डामा समेटेका कँडेलले कृषक लक्षित गरी निशुल्क ब्याजदर, बजार व्यवस्थापनको लागि पहल गर्ने बताएका छन् ।

भरतपुर महानगरको पश्चिमी बेल्ट स्वास्थ्य र शिक्षाका हिसावले पछि परेकाले आफ्नो क्षेत्रमा पर्ने दिव्यनगर स्वास्थ्यचौकीलाई १५ शैयाको अस्पताल बनाई २४ घण्टा सुत्केरी सेवा प्रदान गर्ने व्यवस्थाको प्राथमिकतामा पारेकाछन् । भुइँमान्छेहरुकै बीचबाट नेतृत्व लिन तम्सिएका कँडेल आफ्नो उमेदवारी भुइँमान्छेहरुको अस्तित्वका लागि समेत महत्वपूर्ण रहेको बताउँछन् । “म यस क्षेत्रको सामान्य कृषक हुँ, यहाँको समस्या र अवसर मैले बुझेको छु,” कँडेलले भने, “म यहाँको विकासका लागि मरिमेटेर काम गर्न सक्छु भन्ने विश्वास सबैले गर्नुहुन्छ भन्नेमा ढुक्क छु ।”

सामान्य ढंगमा चुनावी प्रचारप्रसार र घरदैलोमा खटिएका कँडेल प्रत्यकको घरदैलोमा पुग्ने गरेकाछन् । निकै सरल र सामान्य देखिने व्यक्तित्वका कारण उनी आम सर्वसाधारण, ज्येष्ठ नागरिकको मन जित्न सफल पनि देखिन्छन् ।

भरतपुर–२६ स्थित कालाबञ्जर मध्यवर्ती सामुदायिक वन उपभोक्ता समितिका अध्यक्ष तथा लायन्स क्लब अफ दिव्यनगरको वर्ष २०२०÷२१ का लागि अध्यक्ष तथा विभिन्न सामाजिक सस्थामा आबद्ध कँडेलको मूल मन्त्र नै धैर्यता हो । उनी भन्छन,“जसले धैर्यपूर्वक काम गर्छ ऊ एकदिन सफल भएरै छाड्छ ।

म जुनसुकै क्षेत्रमा लाग्दा प्रबिद्ध भएर लाग्छु ,आशा छ मेरा वडावासीले मलाई विश्वासको मत दिनुहुनेछ । ”