काठमाडौँ : निजी शैक्षिक संस्थाले सरकारले हप्ताको २ दिन बिदा दिने निर्णय नमान्ने भएका छन् । सरकारले निजी शैक्षिक क्षेत्रसँग बिना कुनै छलफल र परामर्श नगरी अचानक अव्यवहारिक निर्णय गरेको उनीहरूको गुनासो छ ।

हप्तामा दुई दिन बिदा दिँदा विद्यार्थीहरूमा मानसिक प्रेसर पर्ने र अध्ययन पाठ्यक्रम पनि समयमा अध्यापन गराउन नसकिने भएको भन्दै निजी शैक्षिक संस्थाहरूले सरकारले यस निर्णयप्रति असन्तुष्टि व्यक्त गरेका हुन् ।

उच्च शिक्षालय तथा माध्यमिक विद्यालय सङ्घ नेपाल (हिसान) ले हप्तामा दुई दिन बिदा दिँदा विद्यार्थीमा मानसिक दबाब पर्ने र पढाएको नबुझ्ने उल्लेख गर्दै हप्तामा दुई दिन बिदा दिने सरकारको निर्णय मान्न नसक्ने बताएको छ। सरकारले दुई दिन बिदा दिने कुराको वास्तविक कारण पनि नदिएकोले निजी शैक्षिक संस्था शनिवार बाहेकका दिनमा खुल्ने छ।

त्यस्तै राष्ट्रिय निजी तथा आवासीय विद्यालय सङ्घ (नेशनल प्याबसन) ले पनि सरकारले निजी क्षेत्रसँग छलफल नै नगरि हप्तामा दुई दिन सार्वजनिक बिदा दिने निर्णय गरेकोप्रति आपत्ति जनाएको छ । प्याबसनले कर्मचारीलाई हेरेर सरकारले त्याे निर्णय गरेको भन्दै विद्यालयको हकमा त्यो लागू गर्न नसकिने तथा समय बढाएर बिदा दिन सकिने कुराहरू आइरहे पनि विद्यार्थीहरूको मानसिक असर पर्ने गरी शैक्षिक गतिविधि गरिनु उचित नहुने बताएको छ।