काठमाडौं : अर्थमन्त्री जनार्दन शर्माले देशको अर्थतन्त्र बाहिर प्रचार गरिएजस्तो संकटको अवस्थामा नरहेको दाबी गर्नुभएको छ ।
उहाँले जनता र व्यवसायीलाई हतोत्साहित गर्ने गरी नकारात्मक प्रचारबाजी नगर्न आग्रह समेत गर्नुभयो ।
अर्थ मन्त्रालयमा आयोजित पत्रकार सम्मेलनमा शर्माले भन्नुभयो, ‘अर्थतन्त्रमा संकट आएको भन्ने गलत हो । देशमा के–के न हुन लाग्यो भन्ने ढङ्गले प्रचार भइरहेको छ ।
तर अर्थतन्त्रलाई आफ्नै नियमित गतिमा चल्न दिनुपर्छ । अर्थव्यवस्थाको राजनीतिकरण गरेर देशलाई फाइदा हुँदैन ।’
उहाँले अर्थतन्त्रका विभिन्न आँकडाहरू प्रस्तुत गर्दै आफूहरू सतर्क रहेको बताउनुभयो ।
अर्थमन्त्री शर्माले आयात बढेर देशको अर्थतन्त्रमा दवाव सिर्जना भएको कुरा भने स्वीकार गर्नुभयो ।
उहाँले ‘वस्तु आयातमा भएको उच्च वृद्धिका कारण व्यापार घाटा बढेर अर्थतन्त्रमा दवाव सिर्जना भएको स्वीकार्नुभयो । आयात र निर्यात अघिल्लो आवको तुलनामा ३३.९ प्रतिशत र ७२.८ प्रतिशत बढेको छ ।’
विश्वबजारमा पेट्रोलियम पदार्थमा भएको मूल्यवृद्धिले व्यापार घाटामा चाप पैदा गरेको उहाँको विश्लेषण थियो ।
उहाँले विदेशी मुद्रा सञ्चिती ६ महिनालाई पुग्ने रहेको जानकारी दिनुभयो ।
मुलुकको अर्थतन्त्रबारे जानकारी दिन आयोजित पत्रकार सम्मेलनमा मन्त्री शर्माले रुस युक्रेन युद्धका कारण मूल्यवृद्धि नियन्त्रण गर्ने चुनौती बढेको स्वीकार गर्नुभएको थियो ।
शर्माले विदेशी विनिमय सन्चितिलाई बढावा दिनेगरी नीतिगत कदम चालिएको जानकारी दिनुभयो ।
अर्थ मन्त्री शर्माले दिएको जानकारी अनुसार वस्तु आयातमा भएको उच्च बृद्धिका कारण व्यापार घाटा अत्यधिक भएको छ ।
अर्थ मन्त्रालयले चालु आर्थिक वर्षमा ७ प्रतिशत आर्थिक वृद्धिको लक्ष्य राखिएकोमा अहिले ४ प्रतिशतमा सीमित हुने अवस्था रहेको बताउनुभयो ।
उहाँले राजश्व परिचालन भने अघिल्लो वर्षको तुलनामा १५ प्रतिशतले वृद्धि भएको स्पष्ट पार्नुभयो । शर्माले मुद्रा स्फितीदर ५ दशमलव ४ प्रतिशत रहेको बताउनुभएको थियो ।
