काठमाडौं : नेकपा (माओवादी केन्द्र)का अध्यक्ष पुष्पकमल दाहाल प्रचण्डले आगामी तीनै तहको निर्वाचनमा नेपाली कांग्रेससँग केन्द्रबाटै गठबन्धन हुने बताउनुभएको छ ।
स्थानीय तहको निर्वाचनको मिति घोषणा भएपछि पहिलो पटक आज (बिहीबार) गृह जिल्ला चितवन आउनुभएको प्रचण्डले पत्रकारहरूसँग कुराकानी गर्दै गठबन्धन भइरहेको र तीन तहकै चुनावमा हुने बताउनुभएको हो ।
‘गठबन्धन त भइरहेकै छ नि । अहिलेकै गठबन्धन स्थानीय मात्र होइन प्रादेशिक र संघीय चुनावसम्म पनि रहन्छ, ’ उहाले भन्नुभयो ।
चितवन कांग्रेसले गठबन्धन हुँदैन भने पनि केन्द्रबाटै गठबन्धन हुने उहाले बताउनुभयो । चितवनमा कांग्रेसले एक्लै लड्ने भनेको छ नि भन्ने प्रश्नमा उहाले भन्नुभयो, ‘चितवन कांग्रेसले भनेर केहि हुँदैन ।’
प्रचण्डको निर्वाचन क्षेत्र माडीका विभिन्न स्थानमा आयोजित कार्यक्रममा सहभागी हुन प्रचण्ड आज चितवन आउनुभएको हो । प्रचण्ड शुक्रबार मात्रै काठमाडौं फर्किनुहनेछ ।
