काठमाडौं : नेपाली कांग्रेसले पार्टीको केन्द्रीय कार्यसम्पादन समितिको बैठक बोलाएको छ । बैठक माघ २७ गते पार्टी कार्यालय सानेपामा बस्ने जनाइएको छ ।
कांग्रेस केन्द्रीय कार्यालयका मुख्यसचिव कृष्णप्रसाद पौडेलले विज्ञप्ति जारी गरी म्याद सकिएका भ्रातृ एंव शुभेच्छुक संस्था र जिल्ला अधिवेशन हुन बाँकी १६ जिल्लाको अधिवेशन बारे छलफल गर्न समिति बैठक आह्वान गरिएको जानकारी दिनुभयो ।
नेपाली कांग्रेसका १३ भ्रातृसंस्थामध्ये अधिकांशको कार्यकाल सकिएको छ भने नेपाल विद्यार्थी संघ,तरुण दल,महिला संघ,दलित संघ र मुस्लिम संघ नेतृत्वविहीन अवस्थामा छन् ।
नेपाली कांग्रेसको १४ औं महाधिवेशनबाट निर्वाचन केन्द्रीय समितिको तेस्रो बैठकले दुईसाता अघि ३७ सदस्यीय केन्द्रीय कार्यसम्पादन समिति गठन गरेको थियो ।
४६ सदस्यीय कार्यसम्पादन समितिमा १३ पदाधिकारीसहित ३७ जना सदस्य छन् । बाँकी सदस्य मनोनित गर्न बाँकी छ ।
केन्द्रीय समिति बैठक बस्न नसकेको अवस्थामा आवश्यक निर्णय गर्नसक्ने अधिकार विधानले केन्द्रीय कार्यसम्पादन समितिलाई दिएको छ ।
कार्यसम्पादन समितिले गरेका निर्णयहरु केन्द्रीय समितिबाट अनुमोदन गर्नुपर्ने पार्टी विधानमा व्यवस्था गरिएको छ ।
