चितवनबाटै अब सवारी चालक अनुमति पत्र (लाइसेन्स) नवीकरण हुने भएको छ । यातायात व्यवस्था सेवा कार्यालय चितवनले यही महिनाबाट नवीकरणको काम सुरु गर्ने गरी गरी तयारी थालिएको जनाएको छ । सेवा कार्यालयका प्रमुख सुवास उप्रेतीले यातायात विभागले चितवनको कार्यालयमा पनि सिस्टम जोड्ने तयारी थालेको बताए ।

आफूहरुले सबै प्रक्रिया पूरा गरेर कागजात विभागमा पठाएको बताउँदै उप्रेतीले अब विभागले सिस्टम जोडिदिएपछि नवीकरणको काम सुरु हुने बताए ।

दशैं अघि नै सेवा दिने व्यवस्था मिलाउने गरी तीव्र रुपमा प्रक्रियाको काम भइरहेको विभागबाट जानकारी आएको उप्रेतीको भनाइ छ । प्रदेश सरकारले यही भदौ ४ मा चितवनबाट लाइसेन्स सम्बन्धी सम्पूर्ण काम (नवीकरण तथा नयाँ लाइसेन्स वितरण) गर्न पाउने निर्णय गरेको थियो । प्रदेशले अहिले भएकै कार्यालयमा व्यवस्थापन गरेर नवीकरणको काम तत्काल सुरु गर्न निर्देशन दिएको थियो ।

जसअनुसार पहिलो चरणमा लाइसेन्स नवीकरणको काम सुरु गर्न लागिएको उप्रेतीले बताए । उनले अहिलेको कार्यालय र संरचनामा नयाँ लाइसेन्स वितरणको काम भने सुरु गर्न नसकिने बताए । नयाँ लाइसेन्स वितरणको लागि सबै मापदण्डा पूरा भएको ट्रायल सेन्टरसहित अन्य विभिन्न संरचनाहरु चाहिने बताउँदै उप्रेतीले चितवनमा यो संरचना नरहेको बताए ।

यो संरचना बनाउन बजेट भए पनि जग्गाको अभाव रहेको उनले बताए । भरतपुर महानगरपालिका–१ आँपटारीस्थित सशस्त्र प्रहरीको सीमा सुरक्षा कार्यालय अगाडिको सामुदायिक वनको खाली जग्गामा व्यवस्था कार्यालय स्थापना गर्ने निर्णय ४ वर्ष अघि नै भएको थियो ।

४ वर्षअघि नै चितवनमा व्यवस्था कार्यालय स्थापना गरेर लाइसेन्स वितरण गरिने भन्ने निर्णय भए पनि जग्गा अभावका कारण हालसम्म सो निर्णय कार्यान्वयन हुन सकेको छैन ।

स्थानीय स्तरमा वनको जग्गा दिने सहमति भए पनि संघीय वन मन्त्रालयमा गएर रोकिएको उप्रेतीले बताए । वन क्षेत्रको जग्गा प्राप्तिको लागि संघीय वन मन्त्रालयले थप आवश्यक कागजात मागेको बताउँदै उप्रेतीले आफूहरुले प्रदेश मन्त्रालयमार्फत संघमा फाइल पठाएको बताए ।

संघीय मन्त्रालयले यातायात व्यवस्था सेवा कार्यालय चितवनलाई जग्गा स्वामित्वमा दिने बित्तिकै अर्थात भोगचलन गर्न दिने बित्तिकै आफूहरुले भवनसहितको संरचना बनाउन सुरु गने उप्रेतीको भनाइ छ ।

संरचनासहितको नयाँ भवन बनेपछिमात्र लाइसेन्स वितरणको काम सुरु हुने भएकाले चितवनमा लाइसेन्स वितरण कहिलेबाट सुरु हुन्छ भन्ने अनिश्चित रहेको उप्रेतीले बताए ।

चितवनबाट अहिले सवारी सम्बन्धी सम्पूर्ण काम हुने गर्दछ । सवारी दर्ता, नामसारी र बिलबुकको प्रतिलिपि, बिलबुक नवीकरण, पटके जाँचपास र रुट परमिट लगायतका सेवा उपलब्ध छन् । अरु प्रदेशबाट बागमती प्रदेशमा नामसारी गर्न परेमा पनि चितवनकै कार्यालयबाट हुने गर्दछ । सवारी तथा लाइसेन्स सम्बन्धी सबै काम गर्न चितवनले सबै अधिकार पाए पनि संरचनाको अभावमा सबै सेवा वितरण दिन नसिकएको उप्रतीले बताए ।

लाइसेन्सका लागि चितवनवासीहरु हेटौंडा, बिरगञ्ज, काठमाडौं, पोखरा, कावासोती, बुटवल लगायतका शहरमा पुग्ने गर्दछन् । अधिकांश चितवनवासीहरु हेटांैडाको कार्यालयमा पुग्ने गरेको त्यस कार्यालयले जनाएको उप्रेतीले बताए ।