नारायणीमा आएको बाढीका कारण चितवनका २ सय ३९ घर डुवानमा परेको जिल्ला प्रशासन कार्यालय चितवनले जानकारी दिएको छ । कार्यालयका सुचना अधिकारी खेमराज पौडेलका अनुसार, गएराति भरतपुर महानगरपालिका वडा नम्बर ३, १६, २० र २६ नम्बर वडाका २ सय ३९ घरमा डुवान भएको हो ।

सवैभन्दा धेरै वडा नम्बर ३ को बाह्रघरे, झन्झनेका २ सय १५ घरमा पानी पसेको पौडेलले जानकारी दिनुभयो । त्यस्तै, वडा नम्बर २० भंगेरीका २०, वडा नम्बर २६का ३ घरधुरीमा डुवान भएको उहाँले जानकारी दिनुभयो । उनीहरुलाई राती नै उद्धार गरि सुरक्षित स्थानमा राखिएको थियो ।

अहिले पानीको बहाव घटेकाले आफ्नो घरतर्फ फर्किएको सुचना अधिकारी पौडेलले जानकारी दिनुभयो । नारायणीमा पानी घटेपनि सुरक्षा अपनाउन भने जरुरी रहेको उहाँले बताउनुभयो । ‘अझै केही दिन पानी पर्ने भनिएको छ । जोखिम घटेको छैन । कतिखेर नारायणी बढ्छ थाहा छैन ।’ उहाँले भन्नुभयो, ‘नदी किनारका मानिसहरु उच्च सावधानी अपनाएर बस्न जरुरी छ ।’ लगातार परेको पानीले चितवनमा मानविय क्षति भने भएको छैन ।