अस्पतालको गम्भीर लापरबाहीले इटहरीकी एक सुत्केरी महिलाको मृत्यु भएको छ । विराटनगर स्थित विराट मेडिकल अस्पतालमा भर्ना गरिएकी इटहरी २ की ३२ वर्षीय गंगा दाहालको मृत्यु भएको हो । सामान्य अवस्थामा शनिबार १२ बजे अपस्ताल लगिएकी महिलाको मृत्यु भएपछि अस्पतालमा भेला भएका आफन्तले आक्रोशित हुँदै प्रर्दशन गरेका छन् ।
उनीहरुले उपचारमा खटिएका डाक्टरले गम्भीर लापरबाही गरेको भन्दै चर्काे प्रदर्शन गरेका हुन् । शनिबार राती ११ बजे बिरामीको मृत्यु भएको थियो । डाक्टरहरुको लापरबाहीका कारण बिरामीको मृत्यु भएको आफन्तले बताए । रातको ११ बजे १० पिण्ड रगत मागेको, ३ वर्ष देखि सटेज रहेको औषधी ल्याउनु नत्र सुत्केरीको मृत्यु हुन सक्ने भन्दै आफन्तलाई तनाव दिएको पीडित परिवारले बताएका छन् ।
मानवअधिकारकर्मी इन्द्र न्यौपानेका अनुसार आफन्तले अस्पताल प्रशासनमा प्रर्दशन गरेपछि अस्पताल प्रशासन, मावनअधिकारकर्मी र पीडित पक्षको बैठक बसेको थियो । उक्त बैठकमा मृत्यु भएकी महिलाको नवजात शिशु र ३ वर्षकी छोरीलाई जीवनभर निःशुल्क स्वाथ्य सेवा अस्पतालले दिने, प्रत्येक वर्ष १२ हजारका दरले २० वर्ष सम्म स्वास्थ्य बीमा गरिदिने, सुत्केरीको उपचारमा लागेको सम्पूर्ण खर्च अस्पतालले बेहोर्ने सहमति भएको छ ।
