ब्रिजबेन । मोबाइलमा आएको एउटा लिंकसहितको एसएमएसका कारण सिड्नीमा रहनुभएकी एक नेपालीले १४ हजार २ सय डलर गुमाउनुभएको छ । पार्सल आएको विश्वासमा स्क्यामरले पठाएको लिंकसहितको म्यासेजमा आफ्नो सबै बिवरण भरेर पठाउँदा युवतीले यति धेरै पैसा गुमाउनुपरेको हो ।

अनलाईनमार्फत किनमेल गर्ने यी युवती कतै गिफ्ट नै त परेको छैन भन्ने भ्रममा परेर स्क्यामरको पछि लाग्नुभएको पाइएको छ ।

सबै विवरण भरिसकेपछि तीन लाख अमेरिकी डलरले भरिएको एउटा सुटकेश तपाईको घरमा आएको भन्दै ह्वाट्स एपमा स्क्यामरले पैसाको बार्गेनिङ गरेको, छैन भनेसँगै टाउको, शरिर जोडिएको विभिन्न अश्लिल फोटो, भिडियो बनाएर सामाजिक सञ्जालमार्फत, साथीभाई र आफन्तलाई पठाउने भन्दै डरधम्कीमा पारेर १४ हजार २ सय डलर पठाउन बाध्य भएको पीडित बताउनुहुन्छ ।

डरधम्कीमा परेर जुलाई ७ मा ४ हजार १ सय ५०, जुुलाई ८ मा ७ हजार १५०, जुलाई ९ मा १ हजार ५ सय र जुलाई १० मा १ हजार ४ सय स्क्यामरलाई पठाउनुभएकी पीडित युवती अहिले घरभाडा समेत तिर्न नसक्ने अवस्थामा हुनुहुन्छ । यो एक प्रतिनिधि उदाहरण मात्रै हो । अष्ट्रेलियामा स्क्यामरबाट ठगिनेहरुको संख्या निक्कै ठूलो छ । ठूलो धनरासी गुमाउनु परिरहेको छ ।

वर्षेनी कति ठगि हुन्छ त स्क्यामरबाट ?
सरकारी निकाय स्क्यामवाचको डाटा अनुसार पछिल्लो एक वर्षमा मात्रै स्क्यामरबाट २०५ मिलियन डलर बराबरको ठगी भएको छ । क्रिप्टो लगायतका अन्य घोटालाको दर विगतको वर्षभन्दा १६६ प्रतिशतले बढेको पाइएको छ । मोबाइल एसएमएस स्क्याम मार्फत मात्रै पछिल्लो एक वर्षमा १० मिलियन डलर बराबरको ठगी भएको पाइएको छ ।

एसएमएस मार्फत बढीरहेको ठगी रोक्न नयाँ नियम
सन २०२१ म मात्रै एसएमएस स्क्यामहरूमा १० मिलियन डलर गुमाएपछि मोबाइल प्रदायकहरूका लागि अस्ट्रेलियन कम्युनिकेसन एण्ड मिडिया अथोरिटी (ब्ऋःब्) ले नयाँ कडा नियमहरू लागू गरेको छ । मोबाइल प्रदायकहरूले एसएमएस सन्देश घोटालाहरू पहिचान गर्न, ट्रेस गर्न र ब्लक गर्न, अन्य प्रदायकहरूसँग स्क्याम सन्देशहरू बारेमा को जानकारि आदानप्रदान गर्न, र स्क्याम म्यासेजबारे रिपोर्ट गर्न नयाँ नियमनले बाध्य बनाएको छ । दूरसञ्चार प्रदायकहरूले पछिल्लो नियम पालना नगरेमा २ लाख ५० हजार डलरसम्म जरिवाना तिर्नुपर्नेछ ।

यदी तपाईलाई पनि अपरिचित नम्बरबाट यस्तो लिंकसहितको कुनै म्यासेज आएमा गिफ्टको पछि नलाग्नुहोस् । स्क्यामरको फन्दामा पर्नसक्नुहुन्छ, सचेत बन्नुहोला ।